Psa 27 | TwiNAK | STEP | Awurade ne me hann ne me nkwagye; merensuro obiara. Awurade bɔ me ho ban fi amane mu ɛno nti, merensuro da.

Psalms 27

Ayeyi mpaebɔ

1 Awurade ne me hann ne me nkwagye; merensuro obiara.
Awurade bɔ me ho ban fi amane mu ɛno nti, merensuro da.
2 Sɛ nnebɔneyɛfo toa me pɛ sɛ wokum me a, wohintiw, hwe ase.
3 Sɛ asraafodɔm mpo twa me ho hyia a, merensuro da; sɛ atamfo ba me so a, mede me ho bɛto Onyankopɔn so ara.
4 Ade baako na mabisa Awurade; ade baako na mehwehwɛ; sɛ mɛtena Awurade fi me nkwa nna nyinaa, na mahu nʼanwonwade nyinaa, na mabisa nʼakwankyerɛ.
5 Ɔhaw mu, ɔbɛma me guankɔbea; ɔbɛhwɛ me so wɔ ne fi na wabɔ me ho ban ɔbotan a ɛkorɔn so.
6 Enti medi mʼatamfo a wɔatwa me ho ahyia so nkonim.
Mede anigye bɛbɔ no afɔre wɔ ne fi.
Mɛto dwom; mɛkamfo Awurade.
7 Awurade, sɛ mefrɛ wo a, tie me!
Hu me mmɔbɔ na gye me so!
8 Wokae se, “Bra na bɛsom me.” Mibuae se, “Mɛba,
Awurade.”
9 Mfa wo ho nhintaw me.
Mma wo bo mmfuw me; mpam wo somfo.
Woayɛ me boafo; nnyaw me hɔ; nkɔ nnya me,
O Onyankopɔn, mʼagyenkwa.
10 Mʼagya ne me na begyaw me hɔ, nanso Awurade bɛhwɛ me.
11 Kyerɛ me,
Awurade, nea wopɛ sɛ meyɛ, na di mʼanim kyerɛ me kwan pa efisɛ, mʼatamfo dɔɔso.
12 Nnyaw me mma mʼatamfo, wɔn a wɔde atoro ne ahunahuna ba me so no.
13 Minim sɛ mɛtena ase ahu Awurade papayɛ wɔ asetena yi mu.
14 Fa wo ho to Awurade so.
Nya gyidi.
Mpa abaw.
Fa wo ho to Awurade so.